As obras de rehabilitación integral do CIFP Ánxel Casal na Coruña continúan a bo ritmo, alcanzando xa un 23% de execución e cun investimento certificado de case 600.000 euros. A previsión é que os traballos, que contan cun investimento total de preto de 2,5 millóns de euros, rematen antes de finais de ano.
A delegada da Xunta na Coruña, Belén do Campo, destacou o compromiso do Goberno galego coa mellora dos centros educativos públicos. Subliñou que "investir na calidade das infraestruturas educativas é investir no benestar do alumnado e do profesorado, así como nun ensino público de maior calidade".
A intervención inclúe a renovación completa da cuberta, a instalación dun sistema de illamento térmico exterior (SATE) e a substitución de 257 ventás, ademais de melloras interiores en iluminación, con cambio a LED, e falsos teitos.
O centro, que incrementará a súa capacidade ata os 2.700 estudantes no curso 26/27, é un referente na formación profesional sanitaria en Galicia, ofrecendo 45 cursos, 27 deles na rama de Sanidade. Participa tamén en programas como Plambe ou Radio na Biblio.
Belén do Campo salientou que a adecuación das instalacións permitirá manter o nivel de excelencia da formación que se imparte neste centro, considerado un dos máis importantes de Galicia na Formación Profesional.
A actuación, executada pola empresa IAM Rumbo Instalaciones y Obras, S.L., tamén prevé a reparación de canlóns, a mellora de fachadas fronte ao ambiente mariño e a pintura interior. Con estas intervencións, búscase mellorar a protección fronte ás condicións climáticas e reducir a demanda enerxética.
Estas obras forman parte do Plan de Nova Arquitectura Pedagóxica da Xunta, que tamén inclúe actuacións noutros centros da cidade como o Instituto Ramón Menéndez Pidal e o Colexio Sal Lence, cun investimento total superior aos 4,6 millóns de euros na cidade.
