A secretaria xeral de Emprego e Relacións Laborais, Susana Pérez Iglesias, visitou a sede da Asociación empresarial galega de centros especiais de emprego sen ánimo de lucro (Cegasal). Alí, agradeceu o seu labor no eido da economía social a prol dun mercado laboral forte, dinámico e inclusivo.
Salientou non só a súa implicación na contratación dentro das entidades sen ánimo de lucro, senón tamén na difusión dun modelo económico máis solidario e pegado ao territorio, enmarcado na Rede Eusumo impulsada pola Xunta.
Pérez Iglesias lembrou que Galicia está a executar a segunda Estratexia Galega de Economía Social, cun horizonte ata 2027. O obxecto é reforzar a presenza desta fórmula económica en sectores emerxentes como o tecnolóxico, o industrial ou o verde, ademais de fomentar o emprendemento colectivo e a creación de emprego.
A planificación prevé a creación de 400 novas entidades e a xeración de 4.000 postos de traballo, consolidando a economía social como un piar do ecosistema económico galego.
