O estudo de arquitectura pontevedrés Rodríguez+Pintos SLP será o responsable de levar a cabo esta actuación nun prazo máximo de 25,5 meses. O obxectivo principal é deseñar as intervencións necesarias para resolver as patoloxías da cuberta, mellorar a accesibilidade e a seguridade, e optimizar a eficiencia enerxética do inmoble.
O proxecto definirá a substitución da cuberta e os elementos de evacuación pluvial para solucionar problemas de estanquidade. Tamén abordará a adaptación dos espazos e servizos para fomentar a inclusión e a mellora da accesibilidade e as condicións de evacuación.
Ademais, incluirase unha proposta de sectorización contra incendios na caixa escénica e no resto do edificio, renovaranse elementos decorativos e de equipamento, e avaliarase o estado dos subministros de auga quente, electricidade, iluminación e ventilación, así como a eficiencia enerxética xeral.
O Salón Teatro, situado no casco histórico de Santiago, ten unha longa historia que se remonta a 1919. Tras diversas etapas como sala de eventos, cinema e sede de Acción Católica, foi adquirido pola Empresa Fraga nos anos trinta. Sufriu unha importante remodelación da súa fachada en 1949 polo arquitecto Pons Sorolla.
Un incendio nos anos noventa acelerou o seu deterioro, o que levou ao peche definitivo do cinema. En 1996, a Xunta de Galicia adquiriu o edificio co obxectivo de restauralo. A rehabilitación, dirixida polos arquitectos Baltar, Bartolomé e Almuiña entre 1998 e 1999, devolveulle a súa función orixinal como escenario.
O 29 de outubro de 1999 reabriu as súas portas como sede permanente do Centro Dramático Galego, converténdose nun referente da creación escénica en Galicia.
