Esta renovación é o resultado do traballo conxunto da Secretaría Xeral, a través da unidade de Seguridade da Información, e a Área TIC, xunto co Comité de Seguridade da Información. A USC sitúase así entre as universidades españolas que contan con esta acreditación, sendo a única universidade galega con esta conformidade ao Esquema Nacional de Seguridade.
A acreditación abrangue os sistemas de información que dan soporte a servizos clave como a Xestión Académica, Xestión de Persoal, Sede Electrónica, Calidade, Deportes e Docencia Virtual. Este obxectivo estratéxico forma parte da programación plurianual da institución para o impulso dun sistema de xestión da seguridade da información e a protección de datos.
O Esquema Nacional de Seguridade (ENS) ten como finalidade garantir que os servizos electrónicos se presten de forma adecuada, protexendo a información contra interrupcións ou modificacións non desexadas e asegurando que só persoas autorizadas teñan acceso a ela. Isto fomenta a confianza nos sistemas de información das Administracións Públicas.
O ENS establece os principios básicos e requisitos mínimos para unha protección axeitada da información e dos servizos prestados por medios electrónicos, velando polo acceso, confidencialidade, integridade, trazabilidade, autenticidade e conservación dos datos xestionados polas Administracións no exercicio das súas competencias.
