A conversión do corredor Brión-Noia en autovía, unha actuación estratéxica para mellorar a conexión entre a área de Santiago e O Barbanza, xa ten completado o 10% da intervención nos 5 quilómetros que se estenden entre Brión e Urdilde (Rois). A previsión é que a nova vía poida entrar en funcionamento durante o 2027.

Esta primeira fase, que supón o desdobramento de case 5 km cun investimento de 11,2 millóns de euros, xa conta coa maquinaria traballando en labores previas como o desbroce, drenaxes e movementos de terras. A nova infraestrutura contará con dous carrís de 3,5 metros de ancho en cada sentido, similar á autovía Santiago-Brión.

O presidente da Xunta, Alfonso Rueda, destacou que a obra suporá un beneficio directo para a calidade de vida das persoas, traducíndose en "máis seguridade vial, máis comodidade, máis rapidez e máis desenvolvemento" para os 13.000 vehículos diarios que circulan pola zona.

O proxecto enmárcase na aposta da Xunta pola vertebración do territorio, cunha achega de 263 millóns de euros para infraestruturas viarias este ano. Galicia xa supera os 500 quilómetros de rede propia de vías de alta prestación, co obxectivo de que "oito de cada dez galegos, vivan onde vivan, teñan unha vía de alta capacidade a menos de 10 ou 15 quilómetros do seu lugar de residencia".

O alcalde de Rois, Ramón Tojo, lembrou o "aillamento" do seu municipio antes da construción do corredor, cualificándoo de "ante e despois", e aplaudiu que xa se anticipara o desdobramento na súa proxección inicial.

Rueda tamén repasou outras actuacións en marcha, como a prolongación da autovía da Costa da Morte entre Santa Irena e a AC-432, o último tramo da autovía Lugo-Sarria, e o segundo tramo da autovía Santiago-A Estrada.