Axentes do Destacamento de Tráfico da Garda Civil de Santiago de Compostela iniciaron unha investigación contra dúas persoas por un presunto delito de falsidade documental. Esta acción enmárcase nos controis habituais sobre o transporte por estrada, tras identificar irregularidades no uso de tarxetas dixitais de tacógrafo por parte dun profesional do sector.
Os feitos tiveron lugar durante un dispositivo de inspección estático na autoestrada AP-9. Alí, os axentes interceptaron un vehículo articulado e comprobaron que o condutor, único ocupante, estaba a utilizar unha tarxeta dixital que non lle pertencía. A súa propia tarxeta persoal atopábase oculta no salpicadeiro do vehículo, unha práctica deliberada para falsear os rexistros oficiais de tempos de condución e descanso.
“"Estas prácticas de manipulación non só vulneran a normativa, senón que incrementan o risco de fatiga ao volante, comprometendo gravemente a seguridade viaria e distorsionando a competencia no sector."
Tras o descubrimento, o Grupo de Investigación e Análise de Tráfico (GIAT) do Sector de Tráfico de Galicia fíxose cargo das dilixencias. A investigación estendeuse tanto ao condutor como ao titular da tarxeta, quen tamén é propietario e xestor da empresa. Cabe salientar que esta mesma empresa xa fora obxecto de investigación por parte da Garda Civil en setembro de 2025 por unha irregularidade similar, que resultou na investigación doutros tres implicados.
As dilixencias instruídas foron remitidas ao Tribunal de Instancia de Garda de Santiago de Compostela.
