A exposición, que rende homenaxe ao fotógrafo ourensán José Suárez, figura central do Día das Artes Galegas deste ano, foi cualificada polo director xeral de Cultura como unha "parada obrigatoria" no centro museístico. Lorenzo destacou a "acertada presenza" da mostra pola súa contribución "á dignificación da xente do mar" a través dos retratos do artista.
O representante da Consellería de Cultura, Lingua e Xuventude gabou a iniciativa da Real Academia Galega de Belas Artes de dedicar a efeméride a un fotógrafo, e en concreto a Suárez, subliñando a súa "ollada vangardista" para retratar tanto a "personaxes culturais senlleiros" como "a xente máis humilde, sempre ás marxes, fóra de clixés e creando imaxes icónicas".
A mostra fai especial fincapé na serie Mariñeiros, con imaxes que evocan "a dignidade e esforzo da xente traballadora da Galicia dunha época de grandes sacrificios persoais e colectivos", segundo sinalou Lorenzo.
Esta exposición é unha das 70 propostas do programa 'As exposicións de 2026 como motor cultural da Galicia Calidade' e forma parte da campaña de verán do Goberno galego 'Para gustos, cultura'. A mostra, composta por 16 paneis con textos de recoñecidos autores, poderá visitarse no Museo do Mar de Galicia ata o 9 de setembro. Tras a súa paso por Lugo, A Coruña e A Guarda, e despois de Vigo, a exposición itinerará por Ribeira, Ferrol, Pontevedra e Santiago de Compostela.
