A investigación, que analizou datos de 1.381 pacientes, descubriu unha variante do xene ACTR3, implicado na organización do citoesqueleto, que se asocia cun risco case triplo de desenvolver fatiga persistente despois do tratamento, especialmente en aqueles que non presentaban este síntoma durante a radioterapia.

O primeiro coautor do estudo, Miguel Elías Aguado, destacou que a fatiga relacionada co cancro "non é unha simple sensación de cansazo", senón "un esgotamento profundo, desproporcionado respecto da actividade realizada, que pode durar anos e limitar a vida cotiá dos pacientes".

Ademais, a investigación atopou unha conexión entre a fatiga inducida pola radioterapia e a encefalomielite mialxica ou síndrome de fatiga crónica. A mesma rexión xenética asociada ao cansazo en pacientes oncolóxicos mostra unha correlación estatisticamente significativa coa síndrome de fatiga crónica, suxerindo mecanismos biolóxicos compartidos aínda por explorar.