O proxecto reúne a 110 organizacións de 29 países europeos, incluíndo autoridades sanitarias, organismos de protección radiolóxica, hospitais, universidades e entidades científicas. A iniciativa, que conta cun orzamento total de 14,37 millóns de euros (dos cales 11,5 millóns son financiados pola UE), desenvolverase entre outubro de 2026 e setembro de 2031 baixo a coordinación da autoridade finlandesa de seguridade radiolóxica e nuclear STUK.
A Consellería de Sanidade, a través do Servizo Galego de Saúde, da Axencia Galega de Coñecemento en Saúde (ACIS) e da Empresa Pública de Servizos Sanitarios Galaria, forma parte deste consorcio. A delegación galega en Helsinki estivo integrada polo director da área de Desenvolvemento e Innovación Sanitaria de ACIS, José María Romero, e os profesionais especialistas de Galaria, Antonio López Medina, Benito Andrade Álvarez e Francisco Mosquera-Pena.
A participación galega reforza a colaboración internacional do sistema sanitario público da comunidade en materia de protección radiolóxica e calidade asistencial, permitindo compartir experiencia e contribuír á elaboración de boas prácticas. AURORad enmárcase no Plan de Acción SAMIRA da Comisión Europea e contribúe aos obxectivos do Plan Europeo de Loita contra o Cancro.
As súas liñas de traballo abranguen a xustificación de probas diagnósticas, auditorías clínicas, aprendizaxe de incidentes, xestión de doses, calidade de imaxe, protección en imaxe pediátrica e durante o embarazo, radioterapia guiada por imaxe e terapia radiofarmacéutica.
O Servizo Galego de Saúde contribuirá en paquetes de traballo relacionados coa auditoría clínica, xustificación de procedementos, sistemas de aprendizaxe de incidentes, xestión de doses e calidade de imaxe, radioterapia guiada por imaxe e formación. ACIS achegará experiencia en xestión de proxectos de innovación e capacitación, mentres que Galaria liderará tarefas técnicas de aprendizaxe de incidentes e xestión de doses.
