O Regace permitirá a recollida e análise de datos determinantes da lonxevidade das persoas centenarias residentes na Comunidade Autónoma de Galicia, co fin de avanzar no seu estudo científico. Serán obxecto de inscrición aquelas persoas que teñan cen ou máis anos e residan na comunidade, con aseguramento público ou privado.
Adscrito á Consellería de Sanidade, o rexistro estará integrado como sistema específico na Rede galega de vixilancia en saúde. O persoal sanitario de centros públicos e privados poderá notificar os datos a través dun sistema habilitado para tal fin, garantindo a confidencialidade e o respecto á normativa de protección de datos.
Galicia é a comunidade con máis centenarios de España, cunha cifra estimada de máis de 1.800 persoas, o que representa un 10,7 % da poboación centenaria do Estado. A esperanza de vida na comunidade, segundo datos do Instituto Galego de Estatística de 2024, sitúase en 81,19 anos para os homes e 86,83 para as mulleres, superando a media estatal.
As funcións do Regace inclúen a recollida, integración e análise de datos sociodemográficos e clínico-epidemiolóxicos, a normalización da información segundo pautas estatais e internacionais, e a avaliación e mellora continua do rexistro. Tamén realizará estatísticas e informes periódicos para mellorar o coñecemento sobre a lonxevidade e integrará a información no Observatorio Galego de Saúde Pública.
Esta ferramenta é clave para afrontar os retos da lonxevidade extrema, permitindo dispor dun censo clínico, epidemiolóxico e estatístico detallado das persoas centenarias. Facilitará a planificación e xestión sanitaria, a avaliación de actividades asistenciais e a identificación de grupos de poboación con maior probabilidade de acadar esta condición.
Ademais, o Regace apoiará a atención personalizada, promoverá a difusión de información relevante para o persoal sanitario e a poboación xeral, e fomentará a colaboración con institucións españolas, europeas e internacionais na investigación e formación relacionada coa atención das persoas centenarias.
