A Xunta de Galicia subliñou hoxe a importancia da ciencia e a innovación como piares fundamentais para o futuro da economía azul na comunidade, durante a presentación da nova edición do Foro dos Recursos Mariños e da Acuicultura das Rías Galegas (ForoAcui). O director xeral de Pesca, Acuicultura e Innovación Tecnolóxica, Isaac Rosón, reuniuse cos organizadores do evento, que terá lugar os vindeiros 1 e 2 de outubro no Auditorio Municipal do Grove.
O XXVIII ForoAcui, que coincidirá coa Festa do Marisco, prevé congregar a entre 200 e 250 especialistas, entre investigadores, empresas, profesionais do sector e estudantes. O encontro centrarase na innovación, as novas tecnoloxías, a adaptación ao cambio climático e a xestión sustentable da cadea mar-industria.
O programa articularase arredor de mesas de traballo especializadas en investigación, marisqueo, pesca de baixura, acuicultura, empresa e xestión de recursos mariños. Isaac Rosón eloxiou a traxectoria da organización, que conecta a ciencia co tecido produtivo dende hai case tres décadas, e destacou o papel do foro para visibilizar o traballo de entidades de referencia como o Centro Tecnolóxico do Mar (Cetmar), o Instituto Tecnolóxico para o Control do Medio Mariño (Intecmar), o Centro de investigacións Mariñas de Galicia (CIMA), o Instituto Galego para Formación en Acuicultura (Igafa) e as tres universidades galegas, ademais de abrirse a relatores internacionais.
Como parte do compromiso coa difusión do coñecemento, presentouse tamén o libro anual do XXVII ForoAcui. Esta publicación recolle a memoria técnica da edición anterior, transformando o debate oral nun documento de referencia permanente para investigadores e administracións. Inclúe a conferencia inaugural da directora do Intecmar, Covadonga Salgado, sobre control sanitario e biotoxinas mariñas, xunto con 27 conferencias e 40 comunicacións científicas sobre xestión do mexillón, impacto climático no marisqueo e avances en biotecnoloxía e acuicultura.
