O Festaclown regresa a Vilagarcía de Arousa para celebrar unha nova edición entre o 17 e o 22 de agosto, reforzando a súa dimensión internacional e o seu compromiso coa inclusión. O evento, que conta co apoio da Xunta de Galicia, reunirá compañías de Colombia, Arxentina e Australia xunto a formacións galegas e do resto do Estado, ofrecendo unha programación para todos os públicos en espazos ao aire libre da cidade.
O director da Axencia Galega das Industrias Culturais, Jacobo Sutil, destacou na presentación do festival a súa capacidade para achegar as artes escénicas á cidadanía, sacándoas dos espazos convencionais e combinando creación galega con propostas internacionais. Sutil puxo en valor a programación por "reunir diferentes xeracións arredor do circo contemporáneo" e por facer do espazo público un lugar de encontro.
O festival tamén destaca polo seu compromiso social, integrando a diversidade e a inclusión como parte da proposta artística. Festaclown é unha das máis de 3.600 actividades impulsadas pola Consellería de Cultura, Lingua e Xuventude dentro da campaña de verán Para gustos, cultura.
A Xunta de Galicia achega 13.875 euros a esta cita a través da liña de subvencións a festivais profesionais de artes escénicas, que este ano conta cunha dotación de 290.000 euros para 13 eventos. A convocatoria incrementou a súa dotación global un 3,5% respecto ao ano anterior.
A programación internacional inclúe a Fundación Tchyminigagua de Colombia, que presentará Acrocircus; a compañía arxentina Trotamundos con Finito Infinito; Valeria Altmark con Miss Elastic; e a australiana Maple Staplegun con Breaking Broken Dreams. Tamén haberá representación do resto do Estado con compañías como Bot Project, Spinish Circo, Sue Moreno, Rojo Telón, Las Cossas Nostra, Mr. Vita, Adrián Conde e Z Teatro.
