A conselleira de Política Social e Igualdade, Fabiola García, instou hoxe aos grupos parlamentarios a buscar o consenso para a futura Lei de Medidas Integrais contra o Acoso e a Violencia Dixital de Galicia, que hoxe inicia a súa tramitación parlamentaria. García cualificou a norma como pioneira en España e Europa.
O obxectivo principal da lei é adoptar medidas integrais para a sensibilización, prevención e detección do acoso e da violencia dixital, así como para a protección e apoio ás persoas que o sofren, con especial atención a colectivos vulnerables como menores, mulleres ou persoas LGBTI. Tamén se promoverá a formación de persoal da Xunta, do sector público e das forzas e corpos de seguridade.
Entre as medidas destacadas atópase a inclusión obrigatoria de contidos formativos en competencia dixital nos currículos de todas as etapas educativas non universitarias e a aprobación dun Plan integral contra o acoso escolar e o ciberacoso. Ademais, crearase un servizo gratuíto de borrado da pegada dixital para suprimir material empregado como instrumento de acoso ou violencia.
A conselleira tamén anunciou a posta en marcha dun servizo gratuíto de asesoramento técnico e información para previr novos ataques, garantindo o acceso das vítimas a apoio xurídico desde o primeiro momento, sen necesidade de denuncia previa. Elaborarase tamén unha guía informativa sobre os dereitos das vítimas.
Fabiola García subliñou que se garantirá a asistencia xurídica gratuíta para todas as vítimas, independentemente da idade ou xénero. Engadiu que a Xunta xa puxo en marcha un plan de formación pioneiro en España para o persoal técnico da Xunta en violencia de xénero dixital, que xa realizaron máis de 200 profesionais.
