A vicepresidenta da Deputación de Pontevedra, Luísa Sánchez, participou na presentación da estatua que renderá homenaxe a Carlos Oroza. A figura erixirase nun novo espazo cultural e de encontro que se habilitará nos xardíns da Laxe, en Vigo, a partir de finais deste ano.
A estatua, unha figura de bronce creada polo escultor Sergio Portela, será financiada a partes iguais (un terzo cada unha) pola Deputación, a Xunta de Galicia e a Asociación Évame Oroza. A fundición correrá a cargo do obradoiro de Cuqui Piñeiro.
O obxectivo é converter este enclave nun punto de encontro cultural permanente, aberto á celebración de recitais poéticos, presentacións de libros e outras actividades. A escultura, de preto de 2 metros de altura, asentarase sobre unha peana de granito galego e é froito de máis de dous anos de traballo conxunto.
Luísa Sánchez destacou que a maior homenaxe a Carlos Oroza é adecuar un espazo coma este, que permita a expresión performativa que o poeta ensinou. Agradeceu ao porto de Vigo por facilitar o espazo, e confirmou que a estatua, se todo vai segundo o previsto, podería estar instalada en novembro.
Grazas a esta colaboración e á participación aberta á cidadanía viguesa, este espazo converterase nun escenario cultural permanente, acollido pola figura de Oroza, brindando a Vigo a homenaxe que nunca se lle debeu negar.
