A Consellería de Cultura, Lingua e Xuventude da Xunta de Galicia apoia a celebración da cuarta edición do festival Electrofauna, que se desenvolve dende hoxe xoves, 30 de xullo, ata o sábado 1 de agosto na contorna do parque de Vista Alegre en Santiago de Compostela. O evento inclúe música ao vivo, rutas de descuberta natural, visitas guiadas, proxeccións, artesanía, danza e obradoiros, deseñados baixo os principios do respecto ambiental e dirixidos a todos os públicos.
Electrofauna IV é un dos oito proxectos seleccionados na convocatoria de subvencións da Consellería de Cultura, Lingua e Xuventude para fomentar a contratación de música galega en festivais profesionais. Esta liña de axudas distribúe 80.000 euros en 2026 para apoiar 47 contratacións de bandas e artistas galegos en oito eventos celebrados en Galicia.
A programación musical destaca polas actuacións de artistas galegas como Zeltia Irevire, Catuxa Salom, Peitoescuro, High Paw, XianPais e Terra DJs, ademais de DJ Daasanach, DJ Eva Chloé e Bstudio Danza. Completan a oferta concertos internacionais de Asmaa Hamzaoui & Bnat Timbouktou (Marrocos), Nidia Góngora (Colombia/Francia) e Tiraya (Venezuela).
Ademais da música, o festival ofrece rutas polas zonas verdes da cidade, unha xincana e unha charla sobre especies autóctonas. A Asociación BStudio Danza representará a peza Sub Umbra Duae. Tamén se poderán visitar o Museo de Historia Natural e a Casa de Europa da Universidade de Santiago de Compostela (USC). A ilustradora Raquel Germade impartirá un obradoiro de debuxo botánico e o grupo Tiraya ofrecerá un taller de produción de música electrónica. Haberá tamén atraccións infantís de madeira.
As entradas para os concertos do 1 de agosto xa están á venda. O resto de actividades son de balde ata completar aforo.
