O encontro, organizado pola Axencia para a Modernización Tecnolóxica de Galicia (Amtega) e o Nodo CIBER.gal, coa colaboración do Colexio Profesional de Enxeñaría en Informática de Galicia (CPEIG), reunirá durante tres días a profesionais, empresas, administracións públicas, estudantes e cidadanía. O obxectivo é compartir coñecemento, coñecer novas solucións e analizar os retos dun contorno dixital en constante evolución.
O programa estrutúrase en tres xornadas adaptadas a distintos públicos: a primeira orientada á Administración pública, a segunda ao tecido empresarial e profesional, e a terceira con carácter divulgativo para a comunidade educativa e a cidadanía. As xornadas poderanse seguir de forma presencial ou en liña, con prazas limitadas para a asistencia física e participación gratuíta ata completar aforo.
A relación da ciberseguridade coa intelixencia artificial, a aplicación da directiva europea NIS2, a identidade dixital, a soberanía tecnolóxica e a computación cuántica centrarán boa parte dos contidos profesionais. Como novidade, os asistentes poderán coñecer, previa inscrición, as instalacións e servizos dos laboratorios e centros demostradores de ciberseguridade da Xunta.
O programa tamén inclúe a final do concurso escolar Ciberseguridade no cole!, organizado por Telefónica, actividades dinámicas para escolares e unha competición de retos Capture The Flag (CTF). Os asistentes presenciais tamén poderán desfrutar de momentos de networking.
