A Comunidade Autónoma rexistrou un incremento do 44,1 % no grupo de idade de 65 a 74 anos, sumando preto de 80.000 novos internautas. Estes datos despréndense do informe Seniors Dixitais. Edición 2025, publicado polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega).
En 2025, o 77,4 % das persoas de 65 a 74 anos utilizou Internet nos últimos tres meses, mentres que entre os maiores de 74 anos, a porcentaxe alcanza o 34,5 %. O teléfono intelixente segue a ser o dispositivo máis empregado, cun 82,6 % no grupo de 65-74 anos e un 44,1 % nos maiores de 74.
Os servizos dixitais máis utilizados inclúen chamadas e videochamadas (83,9 % e 79,2 % respectivamente), a lectura de noticias en liña (78,5 % e 60 %), a banca electrónica (68,2 % e 47,8 %) e a cita médica en liña (58 % e 43,5 %). O uso da administración electrónica tamén experimentou un forte crecemento, alcanzando o 70 % entre os 65-74 anos e o 53 % entre os maiores de 74.
O comercio electrónico tamén gaña terreo, cun 34,7 % das persoas de 65 a 74 anos que realizaron compras en liña, un dato que case se duplicou desde 2021. Entre os maiores de 74 anos, a compra por Internet representa o 18,2 % dos usuarios.
Ademais, mellora o equipamento nos fogares sénior: o 69,9 % dos fogares con persoas maiores de 74 anos dispón de Internet contratado, e o 50,6 % conta cun ordenador. O informe tamén destaca que o 63,8 % destes fogares ten conexións de 100 Mbps ou máis.
