A Deputación abriu as portas do Pazo provincial á mostra ‘Rosalía Ilustrada’, unha proposta cultural que establece un diálogo entre a literatura e a arte visual a partir da obra de Rosalía de Castro. A exposición foi inaugurada pola deputada María Ramallo.
Esta mostra, que xa pasou pola sede da Deputación en Vigo, presenta 35 ilustracións de técnica manual realizadas por 34 artistas galegos e galegas. As pezas interpretan textos da autora desde linguaxes plásticas contemporáneas, reflectindo a vixencia da figura de Rosalía de Castro como símbolo cultural de Galicia.
Entre os artistas participantes atópanse nomes como Miguelanxo Prado, Luís Davila, Xaquín Marín, Bea Lema, Elga Lamas, Iria Ribadomar e Andrés Meixide, entre outros.
A deputada María Ramallo destacou o talento dos artistas galegos e o traballo da Deputación de Pontevedra para enxalzar a figura de Rosalía de Castro, mencionando tamén outras iniciativas como as visitas escolares á Casa-Museo e o concurso ‘Canta Rosalía!’.
A exposición ‘Rosalía Ilustrada’ poderá visitarse no vestíbulo do Pazo provincial ata o 31 de agosto, en horario de 9:00 a 20:00 horas de luns a venres.
