A localidade de Ames acolleu a segunda edición do Festival Emerxente, que tivo lugar no parque do Ameneiral. O evento musical reuniu a arredor de 1.000 persoas no seu momento álxido, durante a actuación de Lg1do, un dos artistas destacados do cartel.
O festival presentou unha proposta centrada na música galega emerxente, con artistas como Alddara, Fran Saint Laurent, Metan e Dupliss, ademais de Lg1do. Este último, natural de Santa Comba e nacido en 2008, vén de lanzar o seu primeiro disco, 'Sobresaliente', que inclúe temas con millóns de visitas en plataformas dixitais.
Alddara, procedente de Rianxo e residente en Barcelona, achega unha proposta de pop urbano en galego. Fran Saint Laurent, de Compostela, presentou temas de trap e drill melódico, ademais de dirixir videoclips. Dupliss, veciño de Bertamiráns, mostrou o seu estilo urbano, mentres que Metan, de Brión, aínda que presente en colaboracións, comezará pronto a publicar as súas propias pezas de trap e reguetón.
O evento tamén serviu como antesala á Romaría Urbana que se celebrará mañá sábado 8 de agosto no mesmo parque do Ameneiral, como parte das festas da Peregrina. Esta xornada incluirá música con artistas como abernarias, Moel, Berlai, Maneiro e a orquestra Neverloura, ademais de postos de comida, obradoiros e inchables para nenos, buscando dinamizar o comercio local.
