O acordo, asinado pola alcaldesa de Santiago e presidenta do Consorcio de Santiago, Goretti Sanmartín Rei; o xerente do Consorcio de Santiago, José Antonio Domínguez Varela; e o xerente do Consello Territorial de Galicia da Fundación Laboral da Construción, Fernando García Novo, busca a inserción laboral de persoas desempregadas maiores de 18 anos.
O programa, cunha duración de nove meses, contratará aos 20 alumnos en oficios de cantería, vinculados á restauración e rehabilitación do patrimonio. A Fundación Laboral da Construción achegará 71.000 euros para materiais e maquinaria, ademais de achegar coñecemento técnico e experiencia. O Concello de Santiago facilitará espazos e instalacións municipais.
O proxecto inclúe catro actuacións prácticas en diferentes puntos do municipio: o lavadoiro e muro de mampostería de Pontepedriña de Arriba, a fonte e muros de mampostería de Selva Negra, a recuperación da pasarela sobre o río Sarela, e o lavadoiro de Cornes, onde tamén se formará en rehabilitación de cubertas.
Estas intervencións permitirán ao alumnado adquirir habilidades no oficio da cantería a través de traballos de mantemento, recuperación e rehabilitación de elementos tradicionais e do patrimonio construído.
