A conselleira do Mar, Marta Villaverde, visitou as instalacións de Conservas Sotavento en Outes (A Coruña), onde entregou á compañía o distintivo oficial ‘Artesanía Alimentaria’ para as súas conservas de peixes e mariscos. Este recoñecemento, outorgado pola Axencia Galega da Calidade Alimentaria (Agacal), permitirá á empresa lucir este selo da Xunta de Galicia nas súas elaboracións.
A titular de Mar subliñou o apoio continuo da Xunta ao desenvolvemento deste proxecto empresarial. A Consellería do Mar xa concedera preto de 200.000 € en axudas a Conservas Sotavento, destinadas a apoiar diversos investimentos relacionados coa transformación e comercialización dos produtos do mar.
Entre as actuacións apoiadas atópanse a creación dunha sala de elaboración de conservas artesanais enfocada na posta en valor da pesca costeira e das marcas locais, melloras en eficiencia enerxética, a instalación dunha nova liña para a elaboración de sardiña, investimentos para optimizar a produción e o envasado de peixe e conservas, así como accións de promoción dos produtos pesqueiros.
Villaverde destacou que o selo Artesanía Alimentaria serve para recoñecer e diferenciar as conservas elaboradas con métodos artesanais. Dende 2025, estas producións contan cunha norma técnica específica que regula aspectos como as materias primas, os procesos de elaboración e o grao de mecanización permitido.
Neste sentido, a conselleira puxo en valor o marcado carácter artesanal do modelo de Conservas Sotavento, que integra procesos manuais dende a preparación do produto ata o envasado e etiquetado. A compañía aposta ademais polo produto de proximidade, utilizando sardiña, polbo, mexillón, navalla e algas procedentes das rías galegas, e emprega envases de vidro que requiren a colocación das pezas a man.
A conselleira salientou a Artesanía Alimentaria como unha figura de calidade diferenciada, que axuda a conservar o saber facer tradicional, a distinguir as producións galegas e a incrementar o seu valor engadido. Incidiu tamén en que estes apoios responden á aposta do Goberno galego por fomentar unha industria transformadora competitiva que reforce a posición dos produtos galegos nos mercados.
