O informe Galicia. A nosa vida en dixital. 2025, elaborado polo Observatorio da Sociedade da Información en Galicia (OSIMGA), constata unha notable diminución da fenda dixital por idade na Comunidade Autónoma. Máis do 77% dos galegos maiores de 65 anos xa utilizan a rede.
En concreto, no grupo de idade de 65 a 74 anos, o uso de Internet sitúase no 77,4%, o que representa un incremento do 3,5% respecto a 2024 e case un 39% en catro anos. Un total de 72.894 galegos nesta franxa de idade sumáronse ao uso da rede entre 2021 e 2025.
A nivel xeral, o 94,3% da poboación galega de 16 a 74 anos utilizou Internet nos últimos tres meses, sumando 127.429 novos usuarios desde 2021, superando o crecemento do conxunto de España. O smartphone segue sendo o dispositivo máis empregado (95,7%), mentres que as actividades máis habituais inclúen videoconferencias e consulta de noticias.
A conectividade nos fogares tamén mellora, alcanzando o 95,7% con Internet contratado, o que supón a incorporación de 57.843 fogares desde 2021. Ademais, o 90,6% dispón de velocidades superiores aos 30 Mbps.
As Smart TV convértense, por primeira vez, na tecnoloxía conectable máis estendida nos fogares galegos, cunha presenza do 65,2%, un 49,2% máis que en 2021. Os dispositivos da Internet das Cousas, como os altofalantes intelixentes, xa están presentes no 18,1% dos fogares.
O comercio electrónico tamén medra, co 69,3% da poboación realizando compras en liña, e o 88,4% dos internautas realizando trámites coa Administración pública dixitalmente.
Non obstante, a ciberseguridade segue sendo un reto, xa que o 17,5% dos internautas galegos declarou sufrir algún incidente de ciberseguridade nos últimos doce meses, o que subliña a necesidade de reforzar a concienciación dixital.
