A iniciativa, que se celebra desde o pasado abril en colaboración co obradoiro Eferro no seu espazo eferroGhalpón, reúne na edición de xullo a 10 obradoiros artesanais que traballan o vidro, a encadernación, a sombreirería, a bixutería, a cerámica, os complementos de moda, o feltro e a xoiería.
Participan como expositores Elgoal (A Rúa), Julia Vilariño (Pontedeume), LatonQueen (Santiago de Compostela), Nobelo a Nobelo (Vedra), Otero Regal Cerámica (Viveiro), Pasamarela (A Coruña), Tokillama (Ferrol), Serendipia (Viana do Bolo) e os obradoiros de Ribeira Arlequina Diseño e Sofo. A feira está aberta de 11,00 a 15,00 e de 16,00 a 20,00 horas.
Ademais da exposición, realízase un taller téxtil de macramé, ‘Tecendo flores cos dedos’, impartido pola artesá Ana Loredo do obradoiro Nai Diseños (Vigo), que rematará ás 19,00 h. A programación complétase cunha sesión vermú do grupo Son Galaico a partir das 13,30 h., e un monólogo de Xosé Antonio Touriñán ás 20,00 h.
