A Cátedra Institucional de Xestión Cultural da USC, especializada en Patrimonio Cultural e dirixida polos profesores Gonzalo Francisco Fernández Suárez e Mª Dolores Fernández Tilve, impulsou a mesa coloquio ‘O Arde Lvcvs a debate’. O encontro, celebrado na Casa do Saber do Pazo de Montenegro, tivo como obxectivo reflexionar sobre os desafíos actuais e futuros do Arde Lucus, unha festa recoñecida como de Interese Turístico Internacional e fundamental para a identidade de Lugo, no marco da conmemoración do seu 25 aniversario.
No faladoiro participaron Pilar Rey Fernández, da Asociación ‘Asamblearias Lucus Augusti’; Teófilo García Rodríguez, da Asociación ‘Caetra Lucensium’; e Roberto Argiz Lourés, do ‘Grupo Vindicta Recreación Histórica’. A moderación correu a cargo do director da Cátedra e decano da Facultade de Humanidades da USC, Gonzalo Francisco Fernández Suárez.
Esta xuntanza representou unha oportunidade para escoitar as perspectivas dos diferentes representantes das asociacións culturais vinculadas ao Arde Lucus. Abordáronse temas como o papel da participación cidadá, a identidade da festa, as súas fortalezas e debilidades, e os retos a afrontar nos próximos anos. En definitiva, permitiu analizar a traxectoria e evolución do Arde Lucus ao longo dos seus 25 anos como festa de recreación histórica lucense, ademais de propoñer melloras para o seu futuro.
A actividade tamén buscou promover a cultura e o patrimonio inmaterial como símbolos identitarios, poñéndoos ao servizo do coñecemento universitario. Dende a dirección da Cátedra sinalan a importancia de establecer nexos entre o coñecemento e a sociedade.
O evento contou coa presenza de numerosas autoridades, incluíndo a subdelegada do Goberno en Lugo, o director territorial da Consellería de Cultura, Lingua e Xuventude en Lugo, a alcaldesa e concelleiros do Concello de Lugo, o xerente da Rede Museística Provincial de Lugo, a directora do Museo Provincial de Lugo, o director do Museo Diocesano Catedralicio de Lugo, un patrón do Museo do Pobo Galego, membros da Real Academia Galega de Belas Artes, o vicerreitor de Coordinación do Campus de Lugo, decanos de centros universitarios, e representantes de asociacións culturais, ademais de público xeral.
