A empresa Montaxes Fivi, S. L., situada no concello coruñés de Teo e especializada no deseño, fabricación e comercialización de condutos de ventilación, recibirá a aprobación definitiva como Proxecto de Interese Autonómico (PIA) para a ampliación das súas instalacións. Esta iniciativa permitirá duplicar a súa capacidade produtiva e planificar o seu crecemento urbanístico e territorial.
O proxecto de ampliación contempla a delimitación dun ámbito de solo urbanizable de uso industrial de 15.814,35 m2, cunha edificabilidade máxima de 10.800 m2. A empresa, que actualmente ocupa unha parcela de 6.445 m2, poderá así incrementar a súa produción, avanzar na tecnificación dos procesos e xerar emprego na contorna.
Montaxes Fivi prevé investir 2,5 millóns de euros e crear preto de 100 postos de traballo, entre directos e indirectos. Unha vez aprobada a ampliación, o inicio das obras deberá realizarse nun prazo máximo de seis meses, estimándose unha execución de dous anos dividida en dúas fases.
Esta é a primeira iniciativa de carácter industrial que conclúe a súa tramitación como PIA desde que se aprobou a normativa reguladora no ano 2021. Outros proxectos industriais declarados PIA inclúen ampliacións de empresas como Aguas do Paraño (Boborás), o campus de I+D do Grupo Santos (Boqueixón), Prefabricados Santa Comba (Santa Comba) e melloras no centro de Coren (Santa Cruz de Arrabaldo).
