Calquera persoa que precise terras para desenvolver ou ampliar unha explotación agraria e/ou forestal, ou para realizar un proxecto con fins ambientais, paisaxísticos, de custodia do territorio, de infraestruturas, patrimoniais ou de conservación da natureza, pode dirixirse ao Banco de Terras. Alí atopará unha listaxe actualizada das parcelas dispoñibles para o seu arrendamento ou cesión por un período determinado.
O Banco de Terras de Galicia é un instrumento da Consellería do Medio Rural cuxo obxectivo é evitar o abandono da terra agraria e poñela a disposición de quen a necesite para usos agrícolas, gandeiros, forestais, de conservación da natureza e do patrimonio, ou outros de interese social. A súa función é dinamizar e mediar entre propietarios e demandantes, ofrecendo garantías e seguridade na xestión.
A consulta e solicitude das parcelas realízase a través da ferramenta web Sistema de Información de Terras de Galicia, accesible na páxina info-sitegal.xunta.gal.
As solicitudes de arrendamento de predios rústicos dispoñibles presentaranse preferiblemente por vía telemática na sede electrónica da Xunta de Galicia ou na páxina web do Banco de Terras, mediante o procedemento MR711B.
Para máis información, os interesados poden contactar coa Consellería no teléfono 881 997 193 ou no correo electrónico bancodeterras@xunta.gal.
