O Diario Oficial de Galicia (DOG) publica hoxe a ampliación orzamentaria do Bono Remuda, unha medida incluída na orde unificada de axudas para persoas traballadoras autónomas. O presuposto da iniciativa elévase así dos 1,5 millóns de euros iniciais aos 2.050.000 euros co obxectivo de cubrir a totalidade das solicitudes recibidas que cumpren os requisitos. Grazas a esta medida, un total de 93 negocios poderán continuar en activo logo da xubilación da persoa titular no ano 2026.
O Bono Remuda contempla apoios para quen colle o testemuño dun negocio, a través de dúas liñas: o Bono remuda rural, para empresas en concellos de menos de 10.000 habitantes, e o Bono remuda xeral, para as que se atopan en concellos de 10.000 habitantes ou máis. As achegas para quen traspasa por xubilación oscilan entre os 3.000 € e 6.000 €, dependendo do tamaño do concello onde estea situado o negocio.
Esta axuda permite cubrir ata o 75 % do custo da remuda, cun máximo de 30.000 euros, co fin de evitar o peche de negocios previamente inscritos na Bolsa de Remuda da Rede de polos de emprendemento e apoio ao emprego. Prevese que as contías poidan incrementarse en caso de que quen adquira a empresa sexa menor de 30 anos ou maior de 52, muller ou persoa desempregada de longa duración, así como se o negocio que se traspasa conta con máis de cinco traballadores, entre outras cuestións.
