O programa Ames en Festas puxo fin a dez días de celebracións tras encadear a Festa da Madalena no Milladoiro e a Peregrina en Bertamiráns. As festas contaron cunha gran afluencia de veciños e visitantes, que gozaron das diversas actividades propostas para todos os públicos.
A Festa da Madalena no Milladoiro arrincou co festival Millarock o 31 de xullo, con actuacións de bandas como Sr Salvaje, Tentáculo Rock, Familia Caamagno, Extrema Función e Factoría de Subsistencia. A localidade acolleu milleiros de persoas que tamén puideron desfrutar de festas infantís e noites de verbena amenizadas pola orquestra Olympus e o DJ Kike Varela.
O pregón inicial das festas da Madalena foi pronunciado polo presidente da SD Milladoiro, José Manuel Dacosta, quen celebrou unha tempada histórica para o club cos éxitos dos seus equipos xuvenís.
Pola súa banda, Bertamiráns celebrou as Festas da Peregrina a partir do mércores 5 de agosto. Destacaron o concerto de De Ninghures no parque do Ameneiral e a verbena coa orquestra París de Noia. Tamén tivo unha gran acollida a segunda edición do Festival Emerxente, con artistas locais como Lg1do e Alddara, e a Romaría Urbana con música, postos de comida e obradoiros.
A veciña de Bertamiráns Isolina Martínez, de 88 anos, foi a encargada do pregón de peche, reflexionando sobre a evolución do municipio. O alcalde de Ames e concelleiro de Cultura, Blas García, destacou que as festas son "para todas e todos, sen ideoloxía", buscando dinamizar as rúas e a economía local.
