O Concello de Ames, a través da concellería de Benestar Social e Voluntariado, colabora con Cidalia no desenvolvemento desta proposta, que entende a migración como unha condición inherente á experiencia humana. Angélica Dass estará en Ames durante esta semana, impartindo obradoiros de memoria e fotografía nos IES de Ames, en Bertamiráns, e no IES do Milladoiro.
O proxecto, financiado pola Dirección General de Patrimonio Cultural y Bellas Artes, convida á cidadanía a participar en sesións fotográficas para xerar imaxes e recompilar relatos que nutrirán o arquivo dixital común. O Museo Migrante en Movemento xa comezou en Madrid e Murcia, e Galicia é a seguinte parada dun percorrido que abarcará dez comunidades e finalizará o 18 de decembro, Día Internacional da Persoa Migrante, en La Laguna (Tenerife).
“"A idea do Museo Migrante Migrante é crear un museo que sexa vivo coas nosas historias migratorias, partindo das definicións da RAE sobre a palabra emigrar que fala de persoas que proceden do exterior, de persoas que cambian de territorio en busca dunha mellor vida dentro do mesmo territorio, e a terceira definición, que é a que máis me gusta, fala de animais e plantas que se moven no territorio."
A presentación do proxecto en Galicia tivo lugar o luns 13 de abril en Ames, cunha rolda de prensa na casa consistorial e un obradoiro no IES de Ames. As sesións fotográficas continuaron na casa da cultura de Bertamiráns. O xoves 16 de abril, Dass estará no IES do Milladoiro, e o venres 17 de abril trasladará o estudo fotográfico á casa da cultura do Milladoiro. Para participar nestas sesións é necesario inscribirse previamente.
Ademais, o venres 17 de abril ás 18:30 horas, celebrarase a conferencia A historia viva de Ames. Museo das InMigrantes na casa da cultura do Milladoiro, con intervencións de Angélica Dass, Clara R. Cordeiro de 7H Cooperativa Cultural, e Leonardo Pena, técnico do Concello de Ames. Durante as actividades entregaranse exemplares do xornal A historia viva de Ames. Museo das InMigrantes, elaborado en 2020.
“"Trátase dun proxecto que vai recoller historias de migración de veciños e veciñas que queiran participar con nós neste Museo Migrante Migrante. É un proxecto que imos levar a cabo con Angélica Dass, que xa estivo en Ames no ano 2020 realizando outro proxecto como foi A historia viva de Ames. Museo das InMigrantes."
