A directora da Axencia Galega de Infraestruturas, María Deza, mantivo un encontro en Santiago de Compostela co presidente da Confederación de Empresarios de Galicia (CEG), Juan Manuel Vieites; da Federación Galega de Transportes de Mercadorías (Fegatramer), Ramón Alonso; a directora da Asociación Empresarial de Transporte de Mercadorías por Estrada (Apetamcor), Natalia Blanco; e o voceiro da asociación de usuarios En Colectivo, Diego Maraña.
Durante a xuntanza, María Deza trasladoulles que a Xunta realizou unha actualización do informe sobre a transferencia e o rescate da AP-9. Segundo os datos presentados, o rescate, a transferencia e as bonificacións seguen supoñendo unha contía case equivalente.
A responsable tamén manifestou que a reserva orzamentaria que tería que realizar a Xunta en relación á Lei de Transferencia aprobada incrementaría ata os 4.000 millóns de euros aproximadamente.
Ademais, reiterou que a transferencia da AP-9 debe realizarse á Comunidade Autónoma de Galicia nos termos aprobados polo Parlamento Galego no ano 2024.
