O Diario Oficial de Galicia (DOG) publicou hoxe a resolución das subvencións destinadas a clubs deportivos, sociedades anónimas deportivas, seccións deportivas e núcleos de adestramento especializado de Galicia. Nesta ocasión, máis de 1.420 entidades serán as destinatarias dos fondos, o que supón un récord de beneficiarios nestas axudas.
A liña I, enfocada a clubs, seccións deportivas e sociedades anónimas deportivas, conta cun orzamento de 1,8 millóns de euros, que se repartirán entre 1.422 entidades. Pola súa banda, a liña II, dirixida aos Núcleos de Adestramento Deportivo Especializado (NADEs), dispón de 210.000 euros para os once NADEs existentes.
Por provincias, Pontevedra é a que rexistra máis entidades subvencionadas con 562 (máis 2 NADE), seguida da Coruña con 532 (máis 5 NADE), Lugo con 184 (máis 3 NADE) e Ourense con 144 (máis 1 NADE).
As axudas individuais poden acadar un máximo de 10.000 euros para os clubs e ata 25.000 euros para os NADEs. Entre os gastos subvencionables inclúense licenzas, seguros, inscricións en competicións, arbitraxes, adestradores, desprazamentos, manutención, aloxamento, material deportivo non inventariable, produtos de farmacia, aluguer de instalacións, persoal e servizos de apoio ao rendemento. Para os NADEs, tamén se cobren gastos correntes.
Ademais, en liña co compromiso contra a violencia, exíxese ás entidades que teñan aprobado o ‘Protocolo de protección dos nenos, nenas e adolescentes fronte a violencia no deporte’ e que conten cunha persoa delegada de protección inscrita no Rexistro de Entidades Deportivas de Galicia.
