As propostas poderanse presentar ata o vindeiro 1 de outubro ás 14:30 h. Os galardóns estrutúranse en tres categorías: o Premio Artesanía de Galicia, dotado con 9.000 euros e que recoñece unha obra artesanal; o Premio Traxectoria, de carácter honorífico, que distingue a carreira profesional dun artesán ou artesá; e as Bolsas Eloy Gesto, destinadas a apoiar a formación especializada de novos profesionais con 4.000 euros cada unha.
A convocatoria conta cunha dotación total de 21.000 euros. A presentación das candidaturas ao Premio Traxectoria e ás Bolsas Eloy Gesto será exclusivamente telemática. Pola contra, as propostas ao Premio Artesanía de Galicia deberán realizarse de xeito presencial na sede da Fundación Artesanía de Galicia, en Santiago de Compostela. As resolucións faranse públicas a finais de ano.
O Premio Artesanía de Galicia 2026 está dirixido a obradoiros artesáns inscritos no Rexistro Xeral de Artesanía de Galicia. Valorarase o deseño, a adaptación e conservación de técnicas tradicionais, a innovación e a calidade da obra.
O Premio Traxectoria 2026, de carácter honorífico, será outorgado a proposta do sector para recoñecer a carreira profesional dun artesán ou artesá galega cun mínimo de 20 anos de actividade acreditada. As candidaturas poderán ser presentadas por obradoiros rexistrados, asociacións profesionais e entidades públicas ou privadas.
Finalmente, as Bolsas Eloy Gesto pretenden impulsar a remuda xeracional e a profesionalización do sector. Poderán premiar ata tres candidaturas con 4.000 euros cada unha para formación especializada en centros de prestixio. Poderán participar artesáns de ata 45 anos en 2026.
