A Vicerreitoría de Ordenación Académica e Oferta Formativa da USC iniciou a súa axenda de internacionalización para o curso 2026-2027 coa participación na 36ª edición da Asociación Europea para a Educación Internacional (EAIE). O evento tivo lugar na cidade escocesa de Glasgow do 8 ao 11 de setembro e reuniu a máis de 7.300 representantes universitarios de todo o mundo.
Na representación da USC asistiu a xefa da Oficina de Mobilidade, Alba Cachafeiro Requeijo. A súa presenza na feira permitiu afianzar relacións e ampliar acordos de colaboración con universidades socias de países como Arxentina, Brasil, Chile, México, Corea, Francia, Italia, Líbano, Reino Unido e Xeorxia.
Ademais, o evento serviu para establecer contactos con novas institucións, sentando as bases para futuras alianzas e oportunidades no ámbito da educación superior internacional.
A USC reafirma o seu compromiso coa internacionalización e prevé manter a súa presenza en feiras educativas relevantes, priorizando aquelas que axuden á captación de estudantado internacional e impulsen a súa visibilidade en mercados clave. A universidade xa confirmou a súa asistencia á próxima edición de EuroPosgrados México 2026, que se celebrará o 7 de novembro na Cidade de México e o 10 de novembro en Guadalaxara.
