Desde a ANPA Pedra Viada, a dirección manifestou a súa preocupación pola situación que se vive no Instituto de Brión, onde as aulas alcanzan temperaturas excesivas xa desde a primavera. Esta problemática, segundo a asociación, non só dificulta a actividade académica, senón que tamén incide negativamente na saúde tanto do alumnado como do persoal docente e non docente.
A entidade subliña que esta circunstancia foi comunicada á Consellería de Educación e ao Concello de Brión, alertando sobre as graves consecuencias. A comunidade educativa sinala a ausencia dun sistema de climatización adecuado no centro e a falta de elementos que poidan mitigar a incidencia directa do sol en certas aulas, o que provoca un aumento considerable da temperatura nos días de maior insolación.
Non se reciben respostas aos correos electrónicos enviados, nin aos escritos presentados por rexistro, nin ás peticións desde o equipo directivo do centro… Cando chamemos dende Urxencias mentres acompañamos a un dos alumnos que teña sofrido un problema de saúde como consecuencia da calor, haberá alguén que descolgue o teléfono e ofreza unha solución?
A pesar de que a situación foi exposta hai máis de dous anos escolares, a ANPA lamenta que non se teñan adoptado medidas efectivas. Incluso se rexistraron casos de malestar grave entre o alumnado debido ao calor. Os pais tamén critican a inacción do Concello de Brión, a quen tamén se lle informou da problemática.
O equipo directivo do centro propuxo a instalación de vinilos con filtro solar nas fiestras das aulas máis afectadas, cun custo estimado de 15.000 euros. Con todo, esta proposta tampouco obtivo resposta por parte da Consellería de Educación, o que xera unha crecente frustración na comunidade educativa.
