Este programa, que se desenvolverá do 1 de xuño de 2026 ao 28 de febreiro de 2027, permitirá aos participantes obter certificados de profesionalidade en dous eidos con alta demanda laboral. Un total de 15 alumnos proceden de Ames e 5 de Brión.
Entre as actuacións previstas, destacan as novas instalacións fotovoltaicas na Casa da Cultura de Bertamiráns e no Centro de Formación e Emprego do Concello de Ames en Aldea Nova. Tamén se realizarán traballos de mantemento en diversas infraestruturas municipais de ambos os concellos, como campos de fútbol, pavillóns polideportivos, casas da cultura, escolas infantís e depuradoras.
No ámbito da xardinería, levaranse a cabo a recuperación ambiental do bosque en galería e obras de xardinería no Parque do Ameneiral en Bertamiráns. Ademais, instalarase un xardín climático na rúa da Madalena en O Milladoiro e realizarase o mantemento dos xardíns da rúa Anxeriz, así como a mellora de zonas verdes e rotondas no Concello de Brión.
“"Este ano optouse por ampliar a formación a dous certificados profesionais. Deste xeito diversificamos a formación en instalacións solares fotovoltaicas e en xardíns e zonas verdes. Animo a todas as persoas que cumpran os requisitos a que se inscriban para poder ter opción a participar neste obradoiro de emprego, xa que é unha oportunidade para formarse en sectores que teñen unha alta demanda de man de obra."
O programa, que combina formación e emprego para persoas desempregadas, conta cunha subvención da Xunta de Galicia de 454.552 euros, ademais de 36.000 euros adicionais destinados a incentivos para a contratación.
