O sinistro ocorreu cando o vehículo se dirixía á canteira da Campa, situada no municipio de Folgoso do Courel. A causa exacta do accidente aínda se descoñece.
O servizo de emerxencias 112 recibiu o aviso dun particular ás 09:23 horas. Ao lugar desprazáronse efectivos sanitarios do 061, o Grupo de Emerxencias Supramunicipais (GES) de Quiroga, a Garda Civil de Tráfico, os bombeiros de Monforte e persoal de mantemento de estradas.
Cando os membros do GES chegaron ao punto, o condutor xa se atopaba fóra do camión accidentado e sen feridas graves aparentes, segundo fontes consultadas. Os bombeiros, que xa se dirixían á zona, foron informados para que regresasen ao seu parque.
A pesar de non presentar lesións de gravidade, o transportista recibiu asistencia sanitaria no mesmo lugar do suceso. A carga de lousa quedou esparexida na vía.
No momento da redacción desta noticia, o camión envirado aínda permanecía na estrada, polo que se aconsella precaución aos condutores que transiten pola LU-651.
