Vigo, 6 de xullo de 2026. Servitalent, consultora boutique de executive search e interim management con sede en Vigo, pechou o primeiro semestre de 2026 operando 26 misións de interim management, a mellor cifra da súa historia e un crecemento do +44 % respecto ao mesmo período de 2025. Os datos confirman unha tendencia de fondo: o interim management deixou de percibirse como un recurso excepcional e reactivo para instalarse como unha alternativa estratéxica coa que as compañías incorporan capacidade directiva de alto nivel de forma inmediata e flexible.
"Os números deste semestre dinnos algo máis que un bo resultado comercial: dinnos que o mercado madurou", afirma Alberto Fernández Varela, CEO e socio fundador de Servitalent. "Cada vez máis empresarios, consellos e comités de dirección entenden que non necesitan unha contratación permanente, longa e custosa para resolver un reto crítico. Necesitan ao directivo axeitado, co mandato axeitado, durante o tempo axeitado. Iso é exactamente o que resolve o interim management."
O sector industrial, motor da demanda
O groso do crecemento procede do sector industrial, que continúa liderando a contratación de directivos interinos en España. As misións pechadas por Servitalent no semestre concéntranse en áreas de transformación operativa, dirección xeral, reestruturación e expansión, onde a velocidade de incorporación —un directivo integrado en cuestión de días— e a orientación a resultados marcan a diferenza fronte á consultoría tradicional ou os procesos de selección permanente.
"A industria vive procesos de transformación que non admiten esperas de seis meses para incorporar a un directivo", sinala Fernández Varela. "O interim manager non vén recomendar: vén executar e a responder dos resultados desde o primeiro día."
Da gran empresa á peme
O dato máis relevante do semestre é quen está a contratar. Se o interim management naceu asociado ás grandes corporacións, hoxe a adopción acelérase con máis forza na pequena e mediana empresa industrial, columna vertebral do tecido produtivo español e galego.
"A peme é precisamente a que máis valor extrae desta fórmula", explica o CEO de Servitalent. "Non ten a capacidade de sumar a persoal a un directivo do máximo nivel para un proxecto concreto, pero si pode incorporalo de forma temporal para liderar unha transformación, profesionalizar unha función ou afrontar un relevo. É acceso a talento sénior de primeira liña cun custo variable e controlado. Ese é o cambio de mentalidade que estamos a ver, e o que explica as nosas cifras."
Galicia: orixe e referencia
Servitalent iniciou a súa andaina en Galicia en 2014, sendo unha das firmas pioneiras en introducir e divulgar o interim management no mercado español. Máis dunha década despois, a compañía converteuse nun referente da disciplina e observa na súa comunidade de orixe un dos mercados máis dinámicos do semestre, cun peso de 14 misións / 54 % da actividade concentrado en empresas galegas, moi especialmente do ámbito industrial.
"Que unha firma nada en Vigo lidere esta disciplina di moito do potencial do tecido empresarial galego", conclúe Fernández Varela. "Galicia ten un sector industrial esixente, competitivo e internacionalizado, e cada vez máis consciente de que a axilidade directiva é unha vantaxe competitiva. Nós crecemos con ese tecido e seguimos comprometidos con el."
Sobre Servitalent SERVITALENT Gestión del Talento Directivo, S.L. é unha consultora boutique de executive search e interim management especializada no sector industrial, con sede en Vigo (Galicia) e alcance internacional a través da rede NPAworldwide (máis de 50 países). Fundada en 2014, a firma acompaña a empresarios, consellos e comités de dirección na incorporación de talento directivo —permanente ou temporal— e no diagnóstico estratéxico das súas necesidades de liderado. Máis información: www.servitalent.com
