O consello de administración de Vipugal autorizou a adxudicación dun contrato para a construción dun edificio de 13 vivendas na rúa As Devesas. A empresa adxudicataria, Coviastec S.L., investirá 2.431.204,90 euros neste proxecto. O edificio, cuxo proxecto foi redactado por UTE M Vázquez Fariña-Rodríguez Fontán, contará con 13 vivendas de promoción pública, garaxes, rochos e dous locais comerciais. Distribuiranse entre soto, planta baixa, tres plantas altas e un baixo cuberta. Na planta soto haberá un rocho e 13 prazas de garaxe. A planta baixa albergará os portais de acceso, un almacén de residuos, locais de instalacións e dous locais comerciais. Nas plantas primeira a terceira haberá tres vivendas de dous dormitorios e unha de tres dormitorios en cada unha. Finalmente, na planta baixo cuberta haberá unha vivenda de tres dormitorios e 12 rochos.
Ademais, autorizouse a adxudicación do contrato para a transformación de locais existentes na parcela 13 de Valdecorvos en tres vivendas de promoción pública. A obra será encargada a Deseño, Enxeñería e Xestión de Obras S.L. por un importe de 344.607,44 euros. O proxecto foi redactado por Germán Gómez Espejo.
En Pontevedra, a Xunta de Galicia promove un total de 306 vivendas de promoción pública. Con estas adxudicacións, a Xunta avanza no seu compromiso de duplicar o parque público de vivenda antes de rematar 2028, alcanzando as 8.000 vivendas, e chegando a 10.000 en 2030. As primeiras chaves xa foron entregadas en xullo en Pontevedra (74 vivendas), seguidas doutras 24 en setembro en Santiago.
