As novas instalacións contarán cun centro de día, unha zona de convivencia aberta á veciñanza e un amplo espazo exterior, ademais dunha sala multiusos para encontros interxeracionais.
O espazo exterior estará equipado con áreas de xogo e lecer, incluíndo un campo de petanca, o xogo da rá, mesas de xadrez e parchís, e equipamentos biosaudables, pensados para o benestar das persoas maiores.
A actuación, financiada pola Deputación de Pontevedra e a Xunta de Galicia, está a ser executada pola empresa local Edigroup Global. O alcalde, Ángel Moldes, supervisou o inicio dos traballos, destacando que se está a cumprir o calendario previsto.
O novo centro, situado nunha contorna privilexiada preto do Centro de Saúde, ofrecerá atención profesional, programas de estimulación cognitiva, rehabilitación funcional, comedor adaptado, transporte e acompañamento, buscando favorecer o envellecemento no municipio e apoiar ás familias coidadoras.
