As actividades, pensadas para todos os públicos, desenvolveranse durante toda a fin de semana no Centro Cultural de Raxó. A programación comezará este sábado cun obradoiro creativo de globoflexia e maxia en lingua galega, dirixido a nenos e nenas de entre 6 e 12 anos. A entrada será de balde ata completar aforo.
O domingo 17, a partir das 17.30 horas, terá lugar a entrega dos premios do XXXIV Concurso Literario Xaime Illa Couto. Esta edición é histórica pola elevada participación, con 200 traballos chegados de diversos puntos da xeografía galega, como Poio, Pontevedra, Santiago de Compostela, Cangas, Ourense, Tomiño, Valga, A Coruña, Teo, Nigrán, Vilagarcía de Arousa e Caldas de Reis.
“"A elevada participación, tanto do propio concello como doutros municipios galegos, consolida este certame literario edición tras edición."
Tras a entrega dos galardóns, o público poderá asistir a un relatorio a cargo de Marta Dacosta Alonso, licenciada en Filoloxía Galego-Portuguesa e autora de numerosas publicacións sobre a lingua galega. O acto finalizará coa actuación da Escola de Música Tradicional de Poio, que interpretará o himno galego.
Ademais, durante todo o mes de maio, o Centro Cultural Xaime Illa acollerá a exposición De Circe a Morgana. Esta mostra, elaborada polo IES Castelao de Vigo, afonda na traxectoria e obra da escritora e xornalista Begoña Caamaño, homenaxeada este ano nas Letras Galegas, dando visibilidade a unha escrita feminista que ofrece unha perspectiva orixinal dos mitos clásicos.
