O proxecto nace co obxectivo de fomentar o hábito lector, promover o intercambio de opinións e crear un espazo de encontro e convivencia. A actividade está dirixida a persoas adultas do municipio, é gratuíta e está aberta a novas incorporacións, que poden inscribirse no Pazo Besada.
A primeira obra escollida foi Historia de una maestra, de Josefina Aldecoa, que serviu como punto de partida para reflexionar sobre a educación, a liberdade e o papel das mulleres na sociedade. A sesión permitiu intercambiar diferentes puntos de vista nun ambiente participativo.
Os membros do club elixen as obras e, para a próxima sesión, optaron por Golpes de luz, da escritora galega Ledicia Costas. O club celébrase o terceiro mércores de cada mes, ás 19.00 horas, nas instalacións do Pazo Besada.
A concelleira de Benestar e Igualdade, Natividad Torres, destacou que a iniciativa fomenta a conversa, o intercambio de experiencias e as relacións persoais, contribuíndo a previr situacións de illamento e creando vínculos entre a veciñanza.
