A localidade de Vilaboa, concretamente en Riomaior, converteuse este pasado sábado no punto de encontro da música, a cor e a tradición coa celebración do VIII Encontro de Entroidos. Organizado pola Asociación Cultural Cobres, o evento congregou durante toda a xornada a diversos grupos de entroidos tradicionais procedentes de diferentes puntos de Galicia, Cantabria e Portugal.
Este encontro tamén serviu como marco para festexar a recente declaración do Entroido de Cobres como Festa de Interese Turístico Nacional, un recoñecemento á singularidade desta celebración.
A xornada arrincou cun Vermú de Entroido no Chiringo O Camarón Deilán e un obradoiro de baile impartido pola Asociación Cultural Cobres. Pola tarde, un acto oficial conducido por Marci Varela contou coas intervencións do presidente da Asociación Cultural Cobres, Martín Duarte, e do alcalde de Vilaboa, César Poza.
A partir dese momento, o recinto transformouse nun escenario vibrante onde desfilaron e actuaron as principais figuras do Entroido tradicional. Os anfitrións, as Madamas e Galáns de Cobres e as Veteranas de Cobres, compartiron protagonismo con representacións como os Currumiños de Mos, o Entroido de Augasantas de Cerdedo Cotobade, os Merdeiros de Vigo, o Entroido de Samedes, os Xerais da Ulla, as Madamas e Danzantes de Salcedo e a mascarada convidada, o Oso de Salcedo.
Ademais das delegacións galegas, o encontro acolleu representacións doutras zonas da península, incluíndo o Andruido en La Paré de Piasca dende Cantabria, as Pantallas de Xinzo, os Fuliños e Boteiros de Viana do Bolo, o emblemático Jarramplas de Piornal e os Caretos de Lazarim, unha das tradicións máis recoñecidas do norte de Portugal.
