O festival Titirivedra celebrarase en Pontevedra do 13 ao 18 de xullo, cunha programación deseñada para achegar a arte dos monicreques a toda a cidadanía. As funcións terán lugar nos xardíns de Marescot ás 19.00 horas para o público infantil, mentres que a praza do Teucro acollerá os espectáculos dirixidos a adultos as noites do luns e do martes ás 22.00 horas.
O concelleiro de Festas, Demetrio Gómez, destacou que a programación busca ofrecer propostas de calidade nas Festas do verán, pensadas "para todos e para todas, especialmente para as crianzas". Gómez sinalou que Pontevedra aposta por diversificar as disciplinas artísticas e que a experiencia directa co teatro de monicreques é unha alternativa indispensable fronte ao consumo de contidos dixitais.
Pola súa banda, Borja Insua definiu a carteleira deste ano como unha proposta equilibrada e de proxección internacional, que reúne a creadores de Arxentina, Euskal Herria e Galicia. Subliñou a participación de Manuel Mansilla, recoñecido internacionalmente, e a combinación de formacións históricas como Os Monicreques de Kukas co talento emerxente de compañías locais como Titiritrés.
O responsable da compañía Calina Teatro, Plamen Dipchikov, detallou a súa experiencia coa obra Limonardo dá vento. O espectáculo afonda na procura de respostas e no camiño da vida a través dunha criatura nacida dun limón, defendendo que "ao final resulta que sempre vence o que insiste, o que defende a verdade e a xustiza sobre todo".
A programación completa inclúe o luns 13 a representación de Emotivas por Titiritrés (Galiza) e Cóctel para adultos por Manu Mansilla (Arxentina). O martes 14, Manu Mansilla ofrecerá Títeres a cielo abierto e Fantoches Baj (Galiza) presentará Castelao, un corazón á intemperie. O mércores 15, Kalina Teatro (Galiza) representará Limonardo dá vento. O xoves 16, Os Monicreques de Kukas (Galiza) ofrecerá Xan Perillán, compra queixo, compra pan. O venres 17, Títeres Babaluva (Galiza) presentará Feira das sementes, e o sábado 18, Ostomila (Euskal Herria) pechará o ciclo coa obra Alaia.
