O xerente do Servizo Galego de Saúde (Sergas), Luis León, mantivo un encontro de traballo con representantes da Asociación Española Contra o Cancro (AECC) para coñecer de primeira man as súas liñas estratéxicas e ámbitos de actuación. Na xuntanza tamén participaron Alfredo Silva, director xeral de Integración e Innovación Asistencial do Sergas, e por parte da AECC, Ana García (presidenta en Pontevedra e responsable autonómica), Javier Álvarez (presidente da xunta provincial na Coruña) e Adolfo Santos (xerente en Pontevedra).
Os representantes da AECC presentaron os seus programas de apoio integral a pacientes e familiares, iniciativas de promoción de hábitos de vida saudables e prevención do cancro, así como o seu compromiso coa investigación oncolóxica e a redución de desigualdades no acceso a recursos sociosanitarios.
Pola banda da Xunta, abordouse o impulso ao proxecto do Centro de Coidado Integral do Cancro de Galicia e a próxima posta en marcha do Centro de Protonterapia, que comezará a tratar pacientes a finais deste ano ou principios do próximo.
Tamén se tratou a recente creación por parte da Xunta do Consello Técnico Asesor dos Programas de Detección Precoz de Cancro. Este órgano consultivo, comprometido polo Goberno galego coa AECC e desenvolvido pola Dirección Xeral de Saúde Pública, facilitará a participación social na coordinación dos cribados oncolóxicos e servirá de espazo de análise e apoio experto.
Esta iniciativa busca dar un novo impulso á loita contra o cancro, incorporando a representación dos pacientes e profesionais de diferentes ámbitos para mellorar os programas de cribado, a coordinación e a toma de decisións. O consello contribuirá a integrar avances científicos e tecnolóxicos nos programas de detección precoz, situando a prevención no centro da sanidade galega.
Luis León agradeceu o labor da AECC na comunidade e destacou o valor da colaboración entre institucións sanitarias e movemento asociativo para mellorar a atención ás persoas con cancro. Ambas as partes coincidiron na importancia de fortalecer a cooperación para avanzar nunha atención centrada nas necesidades dos pacientes, promover a prevención e reforzar a investigación e a humanización da asistencia.
