O vicepresidente da Deputación de Pontevedra, Rafa Domínguez, recibiu este venres no Pazo provincial á nadadora artística Daniela Suárez. A deportista regresou recentemente do Campionato Mundial Júnior de Natación Artística, celebrado o pasado agosto en Budapest, onde obtivo un total de cinco medallas, destacando o ouro na categoría de dúo libre.
Durante o encontro, Domínguez felicitou á nadadora polo seu logro e eloxiou a súa "capacidade de traballo". Subliñou que Suárez é "un exemplo moi bonito para tantos nenos e nenas da nosa provincia que practican deporte", destacando o seu papel como modelo a seguir.
Así mesmo, Rafa Domínguez reafirmou o compromiso do organismo provincial co apoio ao deporte. "Queremos seguir apoiando aos clubs, aos deportistas e crear condicións para que o talento que temos na provincia poida medrar e chegar o máis lonxe posible", declarou. Tamén recalcou o "orgullo" que supón "ver como unha deportista de Pontevedra leva o nome da nosa cidade e da nosa provincia por todo o mundo".
