A decisión xudicial chega despois de que as pescudas preliminares apuntasen a unha posible discusión entre a vítima e o camioneiro antes do fatal suceso. Os indicios suxiren un posible homicidio doloso, aínda que se agarda a determinación final das investigacións en curso.
Segundo os primeiros datos, a vítima baixou do seu vehículo e enfrontouse verbalmente co condutor do camión instantes antes de ser atropelado no quilómetro 1,400 da estrada PO-531. Tras o incidente, o camioneiro deuse á fuga, sendo detido horas despois pola Garda Civil.
A partir de agora resta por saber se o atropelo foi accidental, o que acarrearía unha imputación por homicidio imprudente, ou se puido haber sido intencionado.
Os especialistas do Instituto Armado teñen por diante un labor complexo para determinar a intencionalidade do atropelo, xa que este tipo de sucesos son difíciles de acreditar. A vítima, un veciño de Vigo de 48 anos, atopábase realizando traballos no polígono de O Vao.
O despregamento de medios de emerxencia, incluíndo sanitarios que non puideron intervir, provocou importantes retencións de tráfico na zona, tanto en dirección a Pontevedra como a Vilagarcía. A alerta mobilizou ao 061, Policía Local, Protección Civil e Garda Civil.
