Esta medida busca "desatascar" o servizo de Disciplina Urbanística, que acumula un elevado número de casos sen resolver. Para iso, crearase un equipo de tres profesionais: un técnico de medio ambiente, un aparellador e un administrativo. A súa contratación terá unha duración inicial de tres anos, con posibilidade de prorrogarse un ano máis.

A maioría dos expedientes pendentes, un total de 557, corresponden a incumprimentos das franxas de protección contra incendios. Destes, 107 son por execución subsidiaria, onde o Concello asume a limpeza dos terreos e despois factura os custos aos propietarios. A normativa actual da Xunta de Galicia esixe que as parcelas privadas estean libres de maleza nun radio de 50 metros de vivendas e edificacións, cun prazo ata o 31 de maio para cumprir e evitar sancións.

En segundo lugar no ranking de infraccións atópanse as ordes de execución por incumprimentos urbanísticos, con 340 expedientes sen pechar. Estas infraccións adoitan estar relacionadas con requirimentos de legalización de inmobles ou terreos, ordes de cesamento de actividade ou medidas de restitución e reparación de espazos, como edificacións en estado ruinoso que precisan ser demolidas ou aseguradas.

O listado complétase con 52 expedientes de disciplina urbanística, 46 de legalización, 43 de informes de avaliación de edificios, 33 de dilixencias previas, 14 de disciplina medioambiental, oito declaracións de caducidade para a reposición da legalidade urbanística e un expediente sancionador. O alcalde Lores vincula este reforzo de persoal ao aumento da actividade urbanística na cidade, que require priorizar as licenzas para novas vivendas e negocios.