A concelleira de Promoción Económica, Anabel Gulías, presentou o evento como "un mercado de mel e de produtos de calidade derivados desta gran materia prima", animando á veciñanza a apoiar o produto local.
Representantes da IXP Mel de Galicia, da Agrupación Apícola de Galicia e da Zona Monumental colaboran na organización desta cita que busca recoñecer o labor fundamental dos apicultores para os ecosistemas, especialmente fronte a ameazas como a avespa velutina e o cambio climático.
A feira ten como obxectivos poñer en valor o sector produtivo primario galego e promover o consumo de produtos protexidos pola Indicación Xeográfica Protexida Mel de Galicia.
A programación inclúe actividades para todos os públicos, como dinámicas infantís, funcións de títeres, obradoiros de elaboración de velas con cera de abella, catas formativas e didácticas, ademais de obradoiros de extracción de mel e degustacións gratuítas.
Os asistentes poderán complementar as degustacións de mel con outros produtos autóctonos como pan de cea e queixos galegos.
