O incivismo en materia de xestión de residuos segue sendo un problema para algúns particulares e empresas na cidade. As 22 novas denuncias interpostas pola Policía Local de Pontevedra poñen de manifesto o incumprimento da ordenanza de residuos, vixente desde xaneiro de 2025.
O concelleiro de Obras, Cesáreo Mosquera, sinalou que estas sancións, de carácter grave, poderían oscilar entre 751 e 1.500 euros, e afectan tanto a cidadáns como a negocios. As denuncias, que parten do 24 de abril, recollen dende restos de obra e poda ata casos de negocios que deixan o lixo fóra dos contedores cando estes están cheos.
A colaboración cidadá e do persoal da empresa concesionaria do servizo de limpeza, Prezero, é fundamental para a detección destas infraccións, que se producen tanto no casco urbano como no rural. Un exemplo citado foi o abandono reiterado de voluminosos nunha parroquia por parte dunha persoa non residente.
O concelleiro descartou a instalación de cámaras de vixilancia como medida principal para cazar aos infractores, cualificándoo como "o ultimísimo recurso". Insistiu na necesidade de cumprir a ordenanza, que obriga á separación de residuos e fai responsables aos produtores, lamentando que, a pesar de que a maioría cumpre, existe unha minoría que o fai "de maneira reiterada e flagrante".
Entre xaneiro e abril deste ano, xa se tramitaran outros 16 "casos flagrantes", que incluían infraccións cometidas por restaurantes, centros médicos, clínicas veterinarias, empresas de obras, un bazar e particulares. As sancións nestes casos tamén eran de carácter grave, con multas de ata 1.500 euros.
No primeiro ano de vixencia da ordenanza, rexistráronse 115 denuncias, maioritariamente leves (entre 80 e 750 euros), por actos como ouriñar ou escupir na rúa. Detectouse tamén unha infracción moi grave, cunha sanción de 1.501 a 3.000 euros, por depositar residuos perigosos en espazos públicos.
