As intervencións, que se estenderán ata o 4 de setembro, concentraranse no lateral dereito da praza, no sentido de circulación dende a rotonda da Praza da Liberdade cara á de Eduardo Pondal. Nesta marxe, o tráfico estará restrinxido entre as 7:00 e as 15:30 horas, reabriéndose a circulación polas tardes e durante as fins de semana.
Esta reconfiguración obrigará a desviar o tráfico. Os vehículos que cheguen á Praza da Liberdade non poderán continuar polo lateral afectado e terán que dirixirse cara a Xeneral Rubín. O tráfico procedente de Alcalde Hevia será dirixido por San Pedro Alcántara cara á avenida de Vigo. A circulación pola marxe contraria da praza manterase sen alteracións.
A alteración máis significativa para os usuarios do transporte público será o traslado da parada de autobús da Praza de Galicia. Dende o martes, esta parada quedará fóra de servizo e os viaxeiros deberán utilizar a situada na avenida de María Victoria Moreno, xunto ao edificio administrativo da Xunta. Este cambio xa se está a anunciar na parada orixinal para informar os usuarios.
Ademais, as obras suporán a eliminación do estacionamento en todo o lateral afectado. As prazas da marxe oposta, así como as zonas de carga e descarga, continuarán operativas. O Concello prevé compatibilizar a entrada e saída dos garaxes co avance dos traballos, agás durante o asfaltado, e informará os garaxes afectados mediante buzoneo o luns.
A elección da segunda quincena de agosto para executar estas obras busca minimizar o impacto no tráfico, completando a fase antes do inicio do curso escolar. A tenente de alcalde, Eva Vilaverde, sinalou que a decisión tamén atendeu recomendacións da Policía e que o verán é máis favorable tecnicamente para os asfaltados, aínda que a meteoroloxía poderá condicionar o ritmo.
Unha vez finalizada esta primeira fase, actuarase sobre o outro lateral da Praza de Galicia cun dispositivo similar. Estes traballos forman parte dun macrocontrato municipal de rehabilitación de firmes cun orzamento de 4.224.436 euros, que abarca preto de 40 quilómetros de vías.
Xa se realizaron intervencións en rúas como 12 de Novembro, Xosé Malvar, e as avenidas de Bos Aires e Compostela. Próximamente, actuaranse en vías como Xosé Adrio, a Alameda, e San Pedro Alcántara, ademais de zonas empresariais como O Vao e O Campiño.
Vilaverde pediu paciencia aos afectados polas molestias inherentes ás obras, recoñecendo a necesidade de renovación da zona. O conxunto do contrato prevé estar concluído entre finais de outubro e principios de novembro, dependendo tamén das condicións meteorolóxicas.
